Konsultohemi me ekspertë për rreziqet dhe mundësitë
Ka mënyra më të buta për të filluar ditën, por dush i ftohtë ofron përfitime shëndetësore që mund t’ju bindin të provoni.
Forcon sistemin imunitar
Një studim i detajuar në Holandë përfshiu 3,000 vullnetarë të cilët praktikuan dush të ftohtë për 30, 60 ose 90 sekonda gjatë përfundimit të dushit. Krahasuar me grupin kontroll që bëri dush normal, pas tre muajsh ata që praktikuan dushin e ftohtë kishin 29% më pak ditë sëmundjeje.
Theksohet se ndryshimi i papritur i temperaturës së lëkurës aktivizon përgjigjen ndaj stresit, duke rritur imunitetin. Megjithatë, ekspozimi i gjatë ndaj ujit të ftohtë mund të jetë i dëmshëm.
Përmirëson shëndetin mendor
Ekspozimi ndaj ujit të ftohtë mund të përmirësojë ndjeshëm shëndetin mendor të pacientëve, madje edhe kur ilaçet dështojnë. Studimi tregon se noti javor në ujë të ftohtë ndihmoi në lehtësimin e depresionit të një gruaje 24-vjeçare. Përmirësimet mund të rrjedhin nga ushtrimi, përballja me sfidën e ftohtit, ose përfshirja sociale.
Përmirëson shëndetin e lëkurës dhe flokëve
Uji i vakët është ideal për larjen e fytyrës, pasi heq papastërtitë pa shkaktuar thatësi. Uji i ftohtë ndihmon në reduktimin e kuqëzimit dhe inflamacionit të lëkurës. Për flokët, uji i ftohtë mbyll kutikulat, duke ruajtur hidratimin, por për largimin e yndyrnave është i këshillueshëm uji i ngrohtë.
Nxit humbjen në peshë
Një rishikim i mbi 100 studimeve sugjeron se zhytja në ujë të ftohtë mund të aktivizojë dhe zgjerojë indin yndyror kafe – një yndyrë “e mirë” që djeg kaloritë – dhe gjithashtu të reduktojë yndyrën “e keqe”, duke ndihmuar kështu në humbjen e peshës.
Liron dhimbjet muskulore, përshpejton rimëkëmbjen
Atletët shpesh kthehen te banjat me akull për të ndihmuar në rimëkëmbjen e tyre, pasi uji i ftohtë vepron si një analgjezik për të ulur ënjtjen dhe inflamacionin e muskujve. Megjithatë, provat mbi efektivitetin e tij janë të kufizuara dhe jo gjithmonë bindëse.
Liron dhimbjet dhe ul intensitetin e migrenës
Ekzistojnë dëshmi anekdotike që sugjerojnë se banjat e ftohta dhe noti në ujë të ftohtë mund të lehtësojnë migrenat e rënda. Këto rrëfime tregojnë se ekspozimi i shkurtër ndaj të ftohtit mund të ulë dhimbjen, ndoshta si rezultat i ndikimit të tyre në receptorët e ftohtit dhe qarkullimin e gjakut në tru.
Përmirëson disponimin dhe nxit mirëqenien emocionale
Ekspertët cekun se ka dëshmi anekdotike nga notarët në ujë të ftohtë që pohojnë se kjo veprimtari përmirëson ndjeshëm humorin dhe mirëqenien e tyre. Shumica e njerëzve raportojnë përfitime në mirëqenien mendore, megjithëse mekanizmi prapa kësaj ndikimi mbetet i paqartë.
Rreziqet shëndetësore të një dushi të ftohtë
Para se të hyni në një dush të ftohtë, është thelbësore të vlerësoni gjendjen tuaj shëndetësore. Ekspozimi ndaj ujit të ftohtë mund të shkaktojë stres dhe rreziqe shëndetësore, veçanërisht për individët me sëmundje kardiovaskulare.
